غلام مزمل عطاؔ اشرفی کی منتخب غزلیں | حسن، محبت اور فکر

غلام مزمل عطاؔ اشرفی کی منتخب غزلیں

حسن، محبت، فکر اور عہدِ حاضر کی ترجمانی

پیشِ نظر غلام مزمل عطاؔ اشرفی کی دو منتخب غزلیں ہیں۔ پہلی غزل میں محبوب کے حسن و جمال، دیدار، زلف، خوشبو، گفتار اور اندازِ دلربائی کو روایتی غزل کے حسین استعارات میں پیش کیا گیا ہے، جبکہ دوسری غزل میں محبت کے احساسات کے ساتھ ساتھ سچ، انصاف، کردار اور معاشرتی رویّوں پر فکر انگیز اظہار سامنے آتا ہے۔

غزل اوّل

نور ہی نور تھا اُن کے رخسار پر
چاند شرما گیا اُن کے دیدار پر

زلف لہرا دیا دن میں شب ہو گئی
میں فدا ہو گیا گیسوئے یار پر

اُن کی آنکھوں میں ایسا عجب بانکپن
دل مچلنے لگا پہلی ہی وار پر

اُن کی خوشبو سے مہکی ہوئی ہر فضا
گل نچھاور ہوئے کوچۂ یار پر

لب ہلائے تو کلیوں نے سر خم کیے
پھول قربان تھے اُن کی گفتار پر

اُن کے چلنے سے مقتل میں جاں آ گئی
موت بھی ہنس پڑی اُن کی رفتار پر

رُخ سے پردہ ہٹایا ہے اُس نے عطاؔ
صبح اُتری ہوئی ہے شبِ تار پر

غلام مزمل عطاؔ اشرفی

سہرسہ، بہار، ہند

غزل دوم

تجھے سوچ کر کتنے ادراک ہوئے
مرے بند ذہنوں پہ افلاک ہوئے

ندیدہ سبھی رازِ دل چاک ہوئے
دیا دل تجھے، اتنے بے باک ہوئے

تری زلف کھولی تو شب چاک ہوئے
مرے صبر کے حوصلے خاک ہوئے

تری زلف لہری تو شب مسکرائی
ستارے بھی لمحوں میں نم ناک ہوئے

لبوں پر ترے جب تبسم کھلا ہے
گلوں کے بھی انداز سفّاک ہوئے

کبھی حرف سچ کے جو لکھنے لگے ہم
ہمارے ہی لہجے غضب ناک ہوئے

وہی لوگ تاریخ لکھنے لگے ہیں
جو کردار کے باب میں خاک ہوئے

عطاؔ شہرِ انصاف کا یہ چلن ہے
کہ قاتل بھی منصف کے پوشاک ہوئے

غلام مزمل عطاؔ اشرفی

سہرسہ، بہار، ہند